وأول سؤال مهم هنبدأ بيه هو:

"إيه الفرق بين أقسام عام (المينستريم) وكريدت؟"

أولًا: يعني إيه "مينستريم" ويعني إيه "كريدت"؟

المينستريم أو زي ما معروفة باسم الأقسام العامة هي الأقسام المتاحة ليك إذا تنسيقك جابك لكلية الألسن، ودي بيبقى ليها تنسيق داخلي بناءًا على درجات اللغة الأجنبية الأولى والثانية، ساعتها بتكون طالب بقسم اللغة المتاحة ليك، ولما بتتخرج بتحصل على ليسانس لغة كذا وآدابها، والموجود منها في كفر الشيخ 6 أقسام: إنجليزي وإسباني وإيطالي وألماني وصيني وفرنسي، وبيبقى متاح لك تدرس لغة تختارها كسكند بجانب الفرست.

طيب والكريدت؟ دي بتبقى برامج مميزة بمصروفات تحت مسمى "برامج الترجمة المتخصصة"، والموجود منها في كفر الشيخ اتنين فقط: إنجليزي وإسباني، ودي بدون تنسيق داخلي وبدون حد أدنى في درجة اللغة الأجنبية الأولى والتانية، ومش شرط تكون جايب مجموع ألسن كفر الشيخ ولكن شرط إنك تكون جايب الحد الأدنى لأقل مجموع لكليات الألسن على مستوى الجمهورية، ووقتها بتكون طالب في البرنامج مش في القسم وفي التخرج بتحصل على ليسانس الترجمة المتخصصة في لغة كذا، وإذا كان الفرست إنجليزي بيبقى متاح لك سكند ألماني أو إيطالي أو إسباني، لكن إذا كان الفرست إسباني بيبقى متاح لك سكند إنجليزي فقط.

طيب، إيه الفرق في الدراسة نفسها؟

في المينستريم أنت بتدرس كل ما يتعلق باللغة، من أدب وقواعد لغوية وترجمة وثقافة وغيرهم، على عكس الكريدت، رغم أنك بتدرس أدب وقواعد، إلا أن التركيز الأكبر بيبقى على الترجمة، وكل ترم بتدرس نوع ترجمة مختلفة عن اللي قبلها زي الصحفية والسياسية والاقتصادية وغيرهم، وأوقات بيدرس لك أساتذة متخصصين في الترجمة من برا الكلية. ورغم أن الإتنين أصبحوا بنظام الساعات المعتمدة، إلا أن في فروق بسيطة في نظام الإمتحانات بينهم، المينستريم بتمتحن ميدترم ثم شفوي ثم فاينل، الكريدت بتمتحن الميدترم على مرتين ثم الفاينل.

ونصيحة مننا ليك: لو بتحب الأدب والدراسات اللغوية، المينستريم هيبقى أفضل لك، لكن لو شغوف بالترجمة وعايز تتخصص فيها، الكريدت هيبقى اختيارك الأمثل.

معلومة مهمة: الأماكن المتاحة في كريدت بتبقى محدودة، فيفضل تلحق من بداية التقديم.

عندك سؤال؟ مش عارف تختار؟

اسألنا في الكومنتات أو ابعتلنا رسالة، وإحنا معاك خطوة بخطوة!