بسم الله الرحمن الرحيم

الجوالة هي مرحلة من مراحل الكشافة و دي بتكون للمرحلة السنية بعد 18 سنة

انتشرت افكار كتير الفترة الاخيرة إن الجوالة مجرد طبلة ورقص وخلاص ودي فكرة غلط جدا فمثلا مصر كانت بتستضيف السنة دي المؤتمر الكشفي العالمي واللي بيضم 157دولة كانوا متجمعين في مصر، وتم فيه مناقشة المعايير والسياسات والأهداف المشتركة للحركة الكشفية في جميع أنحاء العالم،

بس مثلا أنا متاكد إنك مسمعتش عنه مع أنه حدث هو الأكبر في الحركة الكشفية في حين إن ممكن تكون شوفت فيديو لسمر لا يمثل الحركة الكشفية في حركات أو اختلاط غير مناسب لمجرد إن الناس ما بتصدق تلاقي الحاجه السيئة وتنشرها ...... اسمحلي أصلح المفهوم ده وأقولك إن جزء الدف والأغاني والحركات ده جزء ضئيل جدا جدا من نشاط الجوالة وهو ما يسمى بالسمر

السمر هو الجزء الترفيهي بعد يوم طويل شغل في مسابقات وبناء الاراضي، السمر بينمي فيك حاجات كتير لو عندك موهبة زي غناء او القاء او تمثيل هيساعدك تطور الموهبة دي وتعرضها قدام ناس كتير وبينمي جواك ثقة في نفسك كبيرة جدا لانك بتعرض الكلام ده قدام ناس كتير

اما لو جيت بصيت على الإستفادة الحقيقة بعيدًا عن الجانب الترفيهي هتلاقي إن الجوالة بتركز على جوانب كتير جدا في شخصيتك ...

الجانب الديني عندك و ده بسبب تشجيعك على الإلتزام بالصلاة وحفظ القرأن والأحاديث وكمام بيبقى في تسميع ومسابقات تنافسية عشان نتأكد انك كويس في الجانب ده

وبتركز بردو علي الجانب الثقافي و بتشوف هل عندك موهبة؟ مثلا انك تكون شاطر في الكتابة أو المقالات أو النشرات و كل ما شابه ذلك.

الجزء الفني كمان واللي بسببها انت ممكن تطلع موهبة انت نفسك مكنتش تعرف انها موجودة عندك والجوالة بتديلك مساحة كبيرة انك تبدع و تبتكر في الأشكال الفنية وكمان هتتعلم مهارات كتير ممكن تبني عليها كاريرك بعدين زي ناس كتير عملت كدا.

وكمان بتركز علي مهاراتك و لياقتك البدنية وده بسبب إنك في أقل معسكر بتصحي 6 الصبح تعمل الطابور الرياضي بتاعك بالإضافة طبعا للمسابقات الرياضية.

الجانب الإجتماعي في الجوالة هتبني علاقات كتير جدا وهتتعامل مع ناس من كل مكان وفي كل المجالات ومؤسسات ليها مكانتها

وطبعا في جوانب كتير تانية منها ...

اساس اللعبة طبعا و هو حياة الخلاء والإعتماد على النفس وأوعدك إنك بسببها هتطبق مقولة (الجيش قالك اتصرف) و هتنفذها بالشكل الحرفي بسبب المهارات الكشفية اللي انت بتتعلمها من أدوات بسيطة جدا و بتعود عليك بمنفعة كبيرة.

حابب أقولك في النهاية ان احنا مش بتوع دف و طبل و اغاني و حركات بس احنا حركة تربوية تطوعية و هدفنا كله خدمة المجتمع زي مثلا حملات التبرع بالدم الي بتنفذ من قبل الفرق الكشفية و زي حملات التشجير و تزيين و تنضيف الشوارع و لو جيت بصيت علي تقديمات الكليات مثلا للطلاب الجدد هتلاقي الجوالة هما الي بينظموا الأماكن و بيساعدوك في تخليص ورقك و بيردوا علي كل الأسئلة الي ممكن يسالها شخص لسة داخل الكلية جديد.

لو حابب تعرف اكتر عننا هيكون في سيشن تعريفية عن نشاط الجوالة والخدمة العامة تحت شعار "لسة الحياة جوالة"

يوم الثلاثاء 10/1

الساعة 9 مساءاً